నిత్యానంద సరికొత్త లీల.. కొత్తదేశం ఏర్పాటు!
Send us your feedback to audioarticles@vaarta.com
వివాదాస్పద స్వామీజీ నిత్యానంద.. ఈ పేరు కొత్తగా పరిచయం చేయనక్కర్లేదు. ఆధ్యాత్మికత అనేది పక్కనెడితే ఈయన చుట్టూ ఎప్పుడూ వివాదాలు, ఆరోపణలతోనే ఎక్కువగా వార్తల్లో నిలుస్తుంటారు. ఒక్కమాటలో చెప్పాలంటే వివాదాలకు కేరాఫ్ అడ్రస్ అని చెప్పుకోవచ్చు. అంతేకాదు.. కర్నాటకలో నమోదైన రేప్ కేసులో నిందితుడిగా ఉన్న ఆయన ప్రస్తుతం పరారీలో ఉన్నాడు. ఆయన కోసం కొన్ని బృందాలుగా విడిపోయిన పోలీసులు వెతుకుతున్నారు. అయితే ఆయన మాత్రం ఇండియాను వదిలేసి పారిపోయాడు.
స్వామిగారి సరికొత్త లీల!
కేసుల నుంచి బయటపడటానికి ఇలా చేస్తున్నారో..? లేకుంటే ఉత్తిత్తి హడావుడి చేస్తున్నారో తెలియట్లేదు కానీ.. తాను సెంట్రల్ లాటిన్ అమెరికాలోని ఈక్వెడార్లో ఓ దీవిని కొనుగోలు చేశానని.. దాన్ని సొంత దేశంగా ప్రకటించుకోవడం గమనార్హం. అంతేకాదండోయ్ ఆ దేశానికి ‘కైలాస’ అని పేరు కూడా పెట్టుకున్నాడు. కైలాసకు వెళ్లాలంటే సొంతంగా పాస్పోర్టు కావాలట. ఆ పాస్ పోర్టులు ఉంటేనే కైలాసలోకి అనుమతులు ఉంటాయట. జాతీయ జెండా, జాతీయ చిహ్నాలు కూడా పెట్టుకున్నారట. ఇదంతా తన మాయక భక్తుల కోసం త్యాగాలు చేస్తున్నాడట. కైలాస దేశం కోసం kailaasa.org పేరుతో వెబ్సైట్ను కూడా ఆవిష్కరించాడు. కైలాస అంటే ఈ భూమండలంపై ఉన్న గొప్ప హిందూ దేశమని చెప్పుకుంటున్నాడు. అంటే ప్రపంచ పటంలో ఇది కొత్త దేశం అన్న మాట.
రాజ్యంగంతో సహా అన్నీ ప్రత్యేకమే..!
కాగా.. ‘కైలాస’ దేశ అధికార భాషలు: ఇంగ్లిష్, సంస్కృతం, తమిళం అని.. అధికారిక మతం: సనాతన హిందూ ధర్మం, జాతీయ జంతువు: నంది, జాతీయ పక్షి: శరభం, జాతీయ పుష్పం: పద్మం, జాతీయ వృక్షం: మర్రి చెట్టు అని ఆయనకు ఆయనే స్వయంగా ప్రకటించుకున్నాడు. ‘కైలాస’ దేశం కోసం ప్రత్యేకంగా రాజ్యాంగాన్ని కూడా రచించుకున్నాడు. మొత్తం అందులో 547 పేజీలున్నాయి. అంతేకాదు.. ఇవన్నీ అటుంచితే ఈ దేశం విషయంలో తనకు అన్ని అనుమతులు ఇచ్చి.. కైలాస దేశ సార్వభౌమాధికారాన్ని గుర్తించాల్సిందిగా కోరుతూ ఐక్యరాజ్యసమితికి ఒక పిటిషన్ సమర్పించుకున్నాడు. మరి ఐక్యరాజ్యసమితి ఎలా రియాక్ట్ అవుతుందో.. అనేది వేచి చూడాల్సిందే. ఇదిలా ఉంటే స్వామిగారి వ్యవహారంపై నెట్టింట్లో పలువురు ప్రముఖులు, నెటిజన్లు తీవ్రస్థాయిలో విమర్శలు, సెటైర్ల వర్షం కురిపిస్తున్నారు.
Follow @ Google News: గూగుల్ న్యూస్ పేజీలోని ఇండియాగ్లిట్జ్ తెలుగు వెబ్సైట్ను అనుసరించడానికి మరియు వెంటనే వార్తలను తెలుసుకోవడాని ఇక్కడ క్లిక్ చేయండి.