హైదరాబాద్ బంజారాహిల్స్ రాడిసన్ పబ్‌‌లో వెలుగులోకి వచ్చిన రేవ్ పార్టీ ఘటన తెలుగు రాష్ట్రాల్లో సంచలనం సృష్టిస్తున్న సంగతి తెలిసిందే. సెలబ్రెటీలు, బడా బాబుల పిల్లలు అరెస్ట్ అయినట్లు వార్తలు రావడంతో అంతా ఒక్కసారిగా ఉలిక్కిపడ్డారు. ప్రముఖ సింగర్, బిగ్‌బాస్ విజేత రాహుల్ సిప్లిగంజ్ కూడా అరెస్ట్ అయినట్లు ప్రచారం జరగడంతో ఆయన స్వయంగా స్పందించారు. ఫ్రెండ్ బర్త్ డే పార్టీ ఉండటంతోనే తాను పబ్‌కు వెళ్లానని రాహుల్ తెలిపాడు.

అసలు తనకు డ్రగ్స్ ఎలా ఉంటాయో కూడా తెలియదని.. డ్రగ్స్ తీసుకుంటే ఇప్పుడు ఇంట్లో ఎందుకు కూర్చుంటానని ఆయన ప్రశ్నించాడు. అడ్డంగా దొరికిపోయారు అంటూ సోషల్ మీడియాలో తమపై లేనిపోనిదంతా ప్రచారం చేయడం బాధ కలిగించిందని రాహుల్ సిప్లిగంజ్ ఆవేదన వ్యక్తం చేశారు. నిర్ణీత సమయానికి పబ్ మూయకపోతే నిర్వాహకులపై చర్యలు తీసుకోవాలి కానీ తమను ఇబ్బంది పెట్టడం సరికాదన్నాడు.

పబ్ నుంచి బయటకు వెళ్లాలంటే 40 నిమిషాలు టైం పడుతుందని.. క్రౌడ్ ఎక్కువగా ఉండటం వల్లే పబ్ నుంచి బయటకు వెళ్లడం ఆలస్యమైందని రాహుల్ క్లారిటీ ఇచ్చాడు. రాడిసన్ క్లబ్‌కు తాను వెళ్లడం ఇది రెండోసారి మాత్రమేనని... డ్రగ్స్ తీసుకున్న వ్యవహారంపై ఎలాంటి టెస్టులకైనా సిద్ధంగా ఉన్నానని ఆయన సవాల్ విసిరాడు. అర్ధరాత్రి ఒంటిగంట సమయంలో టాస్క్‌ఫోర్స్ పోలీసులు వస్తే.... ఏదో చెకింగ్‌కు వచ్చారని తాము భావించామని రాహుల్ సిప్లిగంజ్ పేర్కొన్నాడు. మొన్నటివరకు డ్రగ్స్‌పై అవగాహన కల్పించిన వ్యక్తినైన తాను డ్రగ్స్ ఎందుకు వాడతానని రాహుల్ ప్రశ్నించాడు.