சூர்யா நடித்து வரும் ’சூர்யா 42’ என்ற படத்தின் படப்பிடிப்பு கடந்த சில மாதங்களாக நடைபெற்று வருகிறது. மேலும் இந்த படத்தின் வரலாற்று கதை அம்சம் கொண்ட காட்சிகளின் படப்பிடிப்பை கேரளா, இலங்கை ஆகிய பகுதிகளில் படமாக்க படக்குழுவினர் திட்டமிட்டுள்ளதாக கூறப்படுகிறது

தமிழ் உள்பட 10 மொழிகளில் உருவாக இருக்கும் இந்த படத்தில் சூர்யா இதுவரை இல்லாத அளவில் அதிக கெட்டப்புகளில் நடித்து வருவதாகவும் இந்த படம் சூர்யாவுக்கு திரையுலக வாழ்வில் ஒரு மைல் கல்லாக இருக்கும் என்று கூறப்படுகிறது.

இந்த நிலையில் ஏப்ரல் 16ஆம் தேதி ’சூர்யா 42' படத்தின் டைட்டில் ரிலீஸ் ஆக இருப்பதாகவும் அதற்காக ஒரு ப்ரோமோ வீடியோவை பட குழுவினர் தயார் செய்திருப்பதாகவும் அனிமேஷனில் உருவாக்கப்பட்டுள்ள இந்த வீடியோவில் டைட்டில் அறிவிப்பு வெளியாகும் என்றும் கூறப்படுகிறது.

இந்த நிலையில் ஏற்கனவே இந்த படத்திற்கு ’வீர்’, ‘அக்னீஸ்வரன்’ உள்ளிட்ட டைட்டில் பரிசீலனை செய்யப்பட்டதாக தகவல் வெளியான நிலையில் தற்போது ’கங்குவா’ என்ற டைட்டிலை படக்குழுவினர் முடிவு செய்திருப்பதாக கூறப்படுகிறது. கடந்த 1984 ஆம் ஆண்டு ரஜினிகாந்த் நடித்த ஹிந்தி படம் தான் ’கங்குவா’ என்பதும் இந்த படம் தமிழில் வெளியாகி சூப்பர் ஹிட் ஆன ’மலையூர் மம்பட்டியான்’ படத்தின் இந்தி ரீமேக் என்பது குறிப்பிடத்தக்கது. இந்த டைட்டில் 10 மொழிகளுக்கும் பொருந்தும் என்பதால் சிறுத்தை சிவா இந்த டைட்டிலை தேர்வு செய்துள்ளதாக கூறப்படுகிறது.

36 வருடங்களுக்கு முன் ரஜினிகாந்த் நடித்த ’கங்குவா’ திரைப்படத்தின் டைட்டில் தான் 'சூர்யா 42' படத்திற்கும் வைக்கப்பட்டுள்ளதா? என்பதை வரும் 16ஆம் தேதி வரை பொறுத்து இருந்து பார்ப்போம்.

சூர்யா ஜோடியாக திஷா பதானி நடித்து வரும் இந்த படத்தில் யோகி பாபு உட்பட பலர் அளித்துள்ளனர் என்பதும் தேவி ஸ்ரீ பிரசாத் இந்த படத்திற்கு இசையமைத்து வருகிறார் என்பதும் குறிப்பிடத்தக்கது.