యంగ్ టైగర్ ఎన్టీఆర్, ఉత్తరాది భామ పూజా హెగ్డే జంటగా ఏస్ డైరెక్టర్ త్రివిక్రమ్ శ్రీనివాస్ దర్శకత్వంలో రూపొందుతున్న సినిమా ‘అరవింద సమేత వీర రాఘవ’. తాజాగా.. ఎన్టీఆర్ పుట్టినరోజు పురస్కరించుకుని సినిమా టైటిల్‌తో పాటు ఫస్ట్ లుక్‌ను కూడా విడుదల చేసింది చిత్ర యూనిట్. ఫ్యాక్షన్ నేపథ్యంలో సాగే ఈ చిత్రంలో జగపతిబాబు, నాగబాబు ఫ్యాక్షనిస్టుల పాత్రలు పోషిస్తున్నట్లు సమాచారం.

అంతేగాకుండా.. ఈ చిత్రంలో ఎన్టీఆర్ రెండు షేడ్స్ ఉన్న పాత్ర‌లో క‌నిపించ‌నున్నాడ‌ని.. వాటిలో ఫ్యాక్ష‌న్‌ లీడర్‌గా కనిపించ‌డం అనే షేడ్‌తో పాటు.. సాఫ్ట్ లుక్‌తో ఉండే షేడ్ కూడా ఉంటుంద‌ని తెలుస్తోంది. ఇప్పటికే ఈ సినిమా రెండు షెడ్యూల్స్‌ను పూర్తి చేసుకోగా.. తదుపరి షెడ్యూల్‌ను త్వరలోనే ప్రారంభించనున్నారు. హారిక అండ్ హాసినీ క్రియేషన్స్ పతాకంపై ఎస్.రాధాకృష్ణ నిర్మిస్తున్న ఈ సినిమాకు తమన్ స్వరాలను అందిస్తున్నారు. సెప్టెంబర్ కల్లా చిత్రీకరణను పూర్తి చేసి.. దసరా పండుగ సందర్భంగా ఈ మూవీని ప్రేక్షకుల ముందుకు తీసుకురావడానికి నిర్మాణ వర్గాలు సన్నాహాలు చేస్తున్నాయి.