கடந்த சில வாரங்களாக கமல்ஹாசன் தமிழகத்தின் பல பகுதிகளுக்கு சென்று கிராம சபை குறித்து மக்களிடம் விழிப்புணர்வு ஏற்படுத்தி வருகிறார். அவரை பார்த்து காப்பி அடித்து திமுக தலைவரும் கடந்த சில நாட்களாக கிராம சபையை நடத்தி வருகிறார். இருவரும் கிராம சபையை தாங்களே கண்டுபிடித்தது போல் பேசி வருவதை நெட்டிசன்கள் ஏற்கனவே கிண்டலடித்து வருகின்றனர்.

இந்த நிலையில் இதுகுறித்த கேள்விக்கு பதிலளித்த நாம் தமிழர் கட்சியின் ஒருங்கிணைப்பாளர் சீமான், 'கமல், ஸ்டாலினுக்கு முன்னரே நானும் எனது கட்சி பிள்ளைகளும் கடந்த இரண்டு ஆண்டுகளாக கிராம சபைகளை நடத்தி வருகிறோம். நாங்கள் கிராம சபையை நடத்தியபோது அது செய்தியாகவில்லை. நடிகர் என்பதால் கமல் நடத்தும்போது அது செய்தி ஆகிவிடுகிறது. இவர்கள் இரண்டு பேரும் கிராமசபை குறித்து அடித்து கொள்வதை பார்த்து நாங்கள் சிரித்து வருகிறோம்' என்றார்.

மேலும் விஜயகாந்த்-ரஜினிகாந்த் சந்திப்பு குறித்து சீமான் கூறியபோது, 'இருவருமே திரைத்துறையில் நீண்டகாலம் இருந்து வருபவர்கள். நெருங்கிய நண்பர்கள். உடல்நலமின்றி சிகிச்சை பெற்று வந்த விஜயகாந்தை சந்தித்து ரஜினிகாந்த் உடல்நலம் விசாரித்ததை நாம் பெரிதுபடுத்த தேவையில்லை' என்றார்.