பெங்களூரை சேர்ந்த சிறுவனுக்கு சமீபத்தில் இதயமாற்று அறுவை சிகிச்சை செய்யப்பட்டது. அறுவை சிகிச்சைக்கு பின்னர் அந்த சிறுவன் தொடர்ந்து ரஜினி படத்தை பார்த்ததால் விரைவில் குணமானதாக டாக்டர்கள் தெரிவித்துள்ளனர்.

தெற்கு பெங்களூரை சேர்ந்த 13 வயது சிறுவன் குஷால் என்பவருக்கு இதயத்தில் கோளாறு ஏற்பட்டதால் அவருக்கு இதயமாற்று சிகிச்சை செய்ய மருத்துவர்கள் முடிவு செய்தனர். கடந்த மாதம் 6ஆம் தேதி பெங்களூரில் உள்ள பிரபல மருத்துவமனையில் அவருக்கு நான்கு மணி நேர இதயமாற்று அறுவை சிகிச்சை வெற்றிகரமாக நடந்தது.

சிறுவன் குஷால் தீவிர ரஜினிகாந்த் ரசிகர் என்பதால் அறுவை சிகிச்சைக்கு பின்னர் தொடர்ந்து அவர் ரஜினி படங்களை பார்த்ததாகவும், இதன் காரணமாக அவர் வலியை மறந்ததுடன், விரைவில் குணமாகியதாகவும் அவருக்கு அறுவை சிகிச்சை செய்த மருத்துவர் ஆச்சரியத்துடன் தெரிவித்துள்ளார்.