சின்னத்திரையிலிருந்து பெரிய திரைக்கு வந்து, பெரிய திரையிலும் மாஸ் நடிகராக மாறலாம் என்ற உத்வேகத்தை பலருக்கு கொடுத்தவர் நடிகர் சிவகார்த்திகேயன். அவர் இன்று தனது பிறந்தநாளை கொண்டாடி வருவதை அடுத்து அவருக்கு நமது உளங்கனிந்த பிறந்த நாள் வாழ்த்துக்களை தெரிவித்துக்கொள்கிறோம்.

தொலைக்காட்சி நிகழ்ச்சிகளில் பணிபுரிந்த சிவகார்த்திகேயன் தமிழ் திரையுலகில் பாண்டிராஜ் இயக்கிய ‘மெரீனா’ என்ற படத்தின் மூலம் நாயகனாக அறிமுகமானார். அதன் பிறகு தனுஷ், விமல் ஆகிய ஹீரோக்களுடன் இணைந்து நடித்த சிவகார்த்திகேயனுக்கு திருப்புமுனை கொடுத்த படம் ‘வருத்தப்படாத வாலிப சங்கம். அதன்பின் அவருக்கு ஏறுமுகம்தான்.

மான் கராத்தே, ரஜினி முருகன், ரெமோ, வேலைக்காரன், கனா, நம்ம வீட்டு பிள்ளை உள்பட தொடர்ச்சியாக வெற்றிப்படங்களை கொடுத்த சிவகார்த்திகேயனின் படங்கள் நல்ல வரவேற்பை பெற்றதையடுத்து தற்போது அவர் தமிழ் திரையுலகின் முன்னணி நடிகர்களின் பட்டியலில் உள்ளார் என்பதும் அவரது ஒவ்வொரு திரைப்படத்திற்கும் மிகப்பெரிய எதிர்பார்ப்பு ஏற்பட்டு உள்ளது என்பதும் குறிப்பிடத்தக்கது.

தற்போது ’டாக்டர்’ மற்றும் ’அயலான்’ ஆகிய இரண்டு திரைப்படங்களில் நடித்து முடித்துள்ள சிவகார்த்திகேயன் லைகா தயாரிக்கும் ’டான்’ என்ற திரைப்படத்தில் நடித்து வருகிறார். இந்த ஆண்டு அவருடைய இரண்டு திரைப்படங்கள் வெளியாகும் என்று எதிர்பார்க்கப்படும் நிலையில் வரும் ஆண்டுகளிலும் அவருக்கு தொடர்ச்சியாக வெற்றி படங்கள் வெளியாக வேண்டும் என்று இந்த பிறந்த நாளில் வாழ்த்துகளை தெரிவிப்போம்.