ప్రయోగాలు చేయడంలో ముందుండే శర్వానంద్.. టాలీవుడ్‌లో తనకంటూ ప్రత్యేకమైన స్థానాన్ని సంపాదించుకున్నాడు. శర్వా సినిమా ఒప్పుకున్నాడంటే.. అందులో ఏదో ఒక ప్రత్యేకత ఉంటుందన్నది కాదనలేని వాస్తవం. స్క్రిప్ట్ బాగుందంటే.. ఏ రిస్క్ అయినా చేస్తాడనే విషయం ఆయన సినిమాలు చూస్తే ఈజీగా అర్థమవుతుంది. అందరి బంధువయా, ప్రస్థానం, మళ్లీ మళ్లీ ఇది రానిరోజు.. ఇలా చెప్పుకుంటూ పోతే.. బోలెడు సినిమాలు. కమర్షియల్ అంటూ కూర్చోకుండా.. తనకు నచ్చిన దారిలో వెళుతున్నాడు.

తాజాగా ఓ ఇంట్రెస్టింగ్ స్క్రిప్టుతో ప్రేక్షకులకు ముందుకు రానున్నాడు. ఆర్ఎక్స్ 100తో టాలీవుడ్ సెన్సేషనల్ డైరెక్టర్ అయిన అజయ్ భూపతితో సినిమా చేయనున్నాడు. వీరిద్దరి కాంబినేషన్‌లో వస్తున్న సినిమాకు ‘మహా సముద్రం’ అనే టైటిల్ ఖరారు అయ్యింది. ఇంతకు ముందు ఈ కథను రవితేజ, నాగ చైతన్యలకు వినిపించారు. అయితే కొన్ని కారణాల వల్ల.. ఇద్దరూ ఈ ప్రాజెక్ట్‌ను వదులుకున్నారు. అయితే అజయ్.. ఈ సారి శర్వాను కలిశాడు. అతను చెప్పిన కథకు శర్వానంద్ ఫిదా అయిపోయాడట. ఇంత మంచి కథతో ఇప్పటి వరకు ఎవరూ రాకపోవడంపై ఒకింత ఆశ్యర్యం కూడా వ్యక్తం చేశాడని ఇండస్ట్రీ టాక్. వెంటనే సినిమా చేయడానికి ఒప్పుకున్నాడట. అంతేగాక.. కథకు సంబంధించి తన ఆలోచనలను కూడా చెప్పాడని సమాచారం. త్వరలో ఈ సినిమాకు సంబంధించిన క్యాస్ అండ్ క్రూ పై మరింత సమాచారం రానుంది.