தமிழ் திரையுலகை பொறுத்தவரை ஒரு நடிகை அதிகபட்சமாக ஐந்து வருடங்கள் நாயகியாக நடித்து தாக்குப் பிடிப்பது என்பது கடினமான ஒரு நிலையாக உள்ளது. ஆனால் 18 வருடங்கள் ஒரு நடிகை நாயகியாக நடித்துக் கொண்டிருப்பது என்பது சாதாரணமான விஷயம் அல்ல. அந்த சாதனையை செய்துள்ள த்ரிஷாவுக்கு வாழ்த்துக்கள் குவிந்து வருகிறது.

கடந்த 2002 டிசம்பர் 13ஆம் தேதி வெளிவந்த சூர்யாவின் ‘மௌனம் பேசியதே’ என்ற திரைப்படத்தில் நாயகியாக அறிமுகமானார் நடிகை த்ரிஷா. இதனை அடுத்து இன்றுடன் அவர் கதாநாயகியாக அறிமுகமாகி 18 வருடங்கள் முடிவடைந்ததை அடுத்து அவரது ரசிகர்கள் அவருக்கு வாழ்த்துக்களை தெரிவித்து வருகின்றனர். மேலும் #18YearsOfSouthQueenTRISHA என்ற ஹேஷ்டேக்கை உருவாக்கி டுவிட்டரில் டிரெண்ட் செய்தும் வருகின்றனர் என்பது குறிப்பிடத்தக்கது.

‘மௌனம் பேசியதே படத்தை அடுத்து விக்ரமுடன் ’சாமி’ ஷாம் உடன் ’லேசா லேசா’ விஜய்யுடன் ’கில்லி’, ‘ஆதி’ மற்றும் ’திருப்பாச்சி’ சூர்யாவுடன் மீண்டும் ‘ஆறு’, அஜித்துடன் ’கிரீடம்’, என அடுத்த பத்தாண்டுகளில் அவர் தமிழ் சினிமாவின் ஆதிக்கத்தில் இருந்தார் என்பது குறிப்பிடத்தக்கது.

அதன்பின்னர் இளைய தலைமுறை நடிகர்களான ஆர்யாவுடன் ‘சர்வம்’, சிம்புவுடன் ‘விண்ணை தாண்டி வருவாயோ, தனுஷுடன் ‘கொடி’ ஆகிய படங்களிலும் நடித்தார். மேலும் த்ரிஷா ஒரு கட்டத்தில் நாயகிக்கு முக்கியத்துவம் கொடுக்கும் ஒருசில படங்களிலும் நடிக்க தொடங்கினார். மேலும் கடந்து 2018ஆம் ஆண்டு விஜய் சேதுபதி நடித்த ’96’ திரைப்படம் அவருடைய திரையுலக வாழ்க்கையில் ஒரு மைல்கல் என்று கூறினால் அது மிகையாகாது. மேலும் கமல்ஹாசனுடன் ’மன்மதன் அம்பு’ மற்றும் ’தூங்காவனம்’ ரஜினியுடன் ’பேட்ட’ ஆகிய படங்களிலும் நடித்து சீனியர் நடிகர்களின் படங்களிலும் நடித்த நாயகி என்ற பெருமையை பெற்றார்.

திரையில் அறிமுகமாகி 18 வருடங்கள் ஆகி விட்ட பின்னும் தற்போதும் இளம் நடிகைகளுக்கு இணையாக அவர் கைவசம் 7 படங்கள் வைத்துள்ளார் என்பதும் அவற்றில் மூன்று படங்கள் ரிலீசுக்கு தயார் நிலையில் உள்ளது என்பதும் குறிப்பிடத்தக்கது.

மேலும் பிரபல இயக்குனர் மணிரத்னம் இயக்கிவரும் ’பொன்னியின் செல்வன்’ என்ற வரலாற்று திரைப்படத்திலும் த்ரிஷா ஒரு முக்கிய கேரக்டரில் நடித்து வருகிறார் என்பது குறிப்பிடத்தக்கது. கடந்த 18 ஆண்டுகளாக திரையுலகில் குயினாக வலம் வந்து கொண்டிருக்கும் த்ரிஷா மென்மேலும் திரையுலகில் சாதனை படைக்க அவருக்கு இந்த நாளில் வாழ்த்து தெரிவிப்போம்.