தளபதி விஜய் நடித்து வரும் ’பீஸ்ட்’ படத்தின் படப்பிடிப்பு ஒருபக்கம் நடந்து கொண்டிருக்கும் நிலையிலேயே இன்னொரு பக்கம் தளபதி விஜய் நடிக்க இருக்கும் 66ஆவது திரைப்படம் குறித்து அதிகாரப்பூர்வ அறிவிப்பு சமீபத்தில் வெளியானது. பிரபல தெலுங்கு தயாரிப்பாளர் தில் ராஜ் தயாரிப்பில், பிரபல தெலுங்கு இயக்குனர் வம்சி இயக்கத்தில் உருவாக இருக்கும் இந்த படம் குறித்த தகவல்களும் அவ்வப்போது இணையதளங்களில் இருந்து வருகிறது என்பது குறிப்பிடத்தக்கது.

குறிப்பாக ’தளபதி 66’ திரைப்படத்தின் நாயகி யார் என்ற கேள்வி ரசிகர் மத்தியில் எழுந்துள்ள நிலையில் இந்த படத்தில் மூவரில் ஒருவர் நாயகியாக நடிக்கலாம் என்று எதிர்பார்க்கப்படுகிறது. குறிப்பாக முதல் முறையாக விஜய்யின் படம் தெலுங்கில் நேரடியாக ரிலீஸ் ஆக இருப்பதால் பிரபல தெலுங்கு நடிகை ஒருவர் தான் நாயகியாகத் தேர்வு செய்யப்படுவார் என்று கூறப்படுகிறது.

’மாஸ்டர்’ மற்றும் ’பீஸ்ட்’ ஆகிய இரண்டு படங்களிலும் விஜய் ஜோடியாக ராஷ்மிகா மந்தனா நடிப்பார் என்று எதிர்பார்க்கப்பட்ட நிலையில் அந்த இரண்டு படங்களையும் அவர் மிஸ் செய்த நிலையில் ’தளபதி 66’ திரைப்படத்தில் எப்படியும் விஜய்க்கு ஜோடியாக நடித்துவிட வேண்டும் என்பதற்காக அவர் தில் ராஜ் மற்றும் வம்சி ஆகியோர்களிடம் பேச்சுவார்த்தை நடத்தி வருவதாக கூறப்படுகிறது.

அதேபோல் இன்னொரு பிரபல தெலுங்கு நடிகையான கியாரா அத்வானி, ’தளபதி 66’ படத்தின் நாயகி பட்டியல் இருக்கிறார் என்பதும், அதுமட்டுமின்றி தமிழ், தெலுங்கு திரையுலகில் பிரபலமாக இருக்கும் கீர்த்தி சுரேஷ் பெயரும் பரிசீலனையில் இருப்பதாக கூறப்படுகிறது. எனவே ராஷ்மிகா மந்தனா, கியாரா அத்வானி, கீர்த்தி சுரேஷ் ஆகிய மூவரில் ஒருவர்தான் இந்த படத்தின் நாயகியாக ஒப்பந்தம் செய்யப்பட வாய்ப்பு இருப்பதாக கூறப்படுகிறது.