தளபதி விஜய் நடிப்பில் உருவாகி வரும் ‘வாரிசு’ படத்தின் படப்பிடிப்பு ஒரு பக்கம் விறுவிறுப்பாக நடைபெற்று வரும் நிலையில் இன்னொரு பக்கம் இந்த படத்தின் படப்பிடிப்பு புகைப்படங்கள் மற்றும் வீடியோக்கள் வெளியாகி படக்குழுவினர்களை அதிர்ச்சி அடையச் செய்துள்ளது.

இந்த நிலையில் கடந்த சில நாட்களுக்கு முன்னர் இயக்குனர் வம்சி, படக்குழுவினர் அனைவருக்கும் செல்போன் அனுமதி இல்லை என்று தெரிவித்து இருந்தார். இதனை அடுத்து இந்த படத்தின் புகைப்படங்கள் மற்றும் வீடியோக்கள் இனி லீக் ஆகாது என்று எதிர்பார்க்கப்பட்டது.

ஆனால் தற்போது திடீரென மீண்டும் விஜய் மற்றும் ராஷ்மிகா சம்பந்தப்பட்ட ரொமான்ஸ் காட்சிகளின் புகைப்படங்கள் இணையதளங்களில் லீக் ஆகியுள்ளது படக்குழுவினர்கள் பெரும் அதிர்ச்சிக்குள்ளாக்கியுள்ளது. செல்போன்கள் அனுமதி இல்லை என்று கெடுபிடி அதிகரிக்கப்பட்டும் புகைப்படங்கள் எப்படி லீக் ஆகிறது என்று புரியாமல் இதுகுறித்த விசாரணையில் படக்குழு இறங்கியுள்ளது. இதுவரை 10க்கும் மேற்பட்ட புகைப்படங்கள் மற்றும் வீடியோக்கள் லீக் ஆகியுள்ளதை அடுத்து கூடுதல் பாதுகாப்பை பலப்படுத்த படக்குழுவினர் திட்டமிட்டுள்ளனர்.

விஜய் ஜோடியாக ராஷ்மிகா மந்தனா நடிக்கும் இந்த படத்தில் பிரகாஷ்ராஜ், சரத்குமார், ஷாம், யோகிபாபு, பிரபு, ஜெயசுதா, ஸ்ரீகாந்த், சங்கீதா, சம்யுக்தா, குஷ்பு உள்பட பலர் நடிக்கின்றனர். தமன் இசையில் கார்த்திக் பழனி ஒளிப்பதிவில், பிரவிண கே.எல் படத்தொகுப்பில் இந்த படம் உருவாகிறது. இந்த படம் அடுத்த ஆண்டு பொங்கல் தினத்தில் வெளியாகவுள்ளது என்பது குறிப்பிடத்தக்கது.