தல அஜித் நடித்து வரும் 'விஸ்வாசம்' படத்தின் படப்பிடிப்பு விறுவிறுப்பாக நடைபெற்று வரும் நிலையில் சமீபத்தில் இந்த படத்தில் இடம்பெற்றுள்ள பாடல் வரி இணையத்தில் வைரலானது. அஜித்தின் ஓப்பனிங் பாடலின் வரிகள் இவை என்றும் கூறப்பட்டது.

பாடலாசிரியர் அருண்பாரதி எழுதிய 'எத்தனை உயரம் இமயமல, அதில் இன்னொரு சிகரம் எங்க தல' என்ற இந்த பாடல் வரிகள் அஜித்தின் ஓப்பனிங் பாடல் வரிகள் என்பதை அறிந்து அஜித் ரசிகர்கள் இணையத்தில் தங்கள் உற்சாகத்தையும் மகிழ்ச்சியையும் வெளிப்படுத்தினர்.

இந்த நிலையில் சற்றுமுன் பாடலாசிரியர் அருண்பாரதி, 'சமூக வலைத்தளத்தில் வைரலாகும் அந்த வரிகள் 'விஸ்வாசம்' படத்தின் பாடல் வரிகள் இல்லை' என்று கூறியுள்ளார். இதுகுறித்து தனது சமூக வலைத்தள பக்கத்தில் அருண்பாரதி கூறியதாவது: வணக்கம். என் மனதில் மரியாதைக்குரியவராய் நிற்கும் அஜித் சார் ரசிகர்களின் அன்புக்காகவும், உற்சாகத்திற்காகவும் எழுதிய வரிகளே அன்றி அந்த வரிகளை விஸ்வாசம் படத்தில் நான் எழுதவில்லை என்பதை பணிவுடன் தெரிவித்துக் கொள்கிறேன்.

அருண்பாரதியின் இந்த தகவலால் மேற்கண்ட பாடல் வரிகள் விஸ்வாசம் படத்தில் அஜித்தின் ஓப்பனிங் பாடல் வரிகள் இல்லை என்பதை அறிந்து அஜித் ரசிகர்கள் அப்செட் ஆகியுள்ளனர்.