இயக்குநர் பா.ரஞ்சித் இயக்கத்தில் சியான் விக்ரம் நடிப்பில் உருவாகிவரும் “தங்கலான்” திரைப்படத்தில் இணைந்து நடித்துவரும் நடிகை பார்வதி இப்படத்தில் தனது அனுபவம் குறித்து முதல்முறையாகக் கருத்துப் பகிர்ந்துள்ளார். அவர் பகிர்ந்துள்ள கருத்துகள் தற்போது இணையத்தில் படு வைரலாகி வருகின்றன.

மலையாளத்தில் வரவேற்பு பெற்ற நடிகையான நடிகை பார்வதி, இயக்குநர் சசி இயக்கத்தில் உருவாகி விமர்சன ரீதியாக மாபெரும் வரவேற்பு பெற்ற திரைப்படமான “பூ” படத்தில் நடித்திருந்தார். தொடர்ந்து தனுஷுடன் “மரியான்” போன்று ஒரு சில படங்களில் மட்டுமே நடித்தவர் தற்போது 13 வருடங்களுக்குப் பிறகு தமிழ் மொழி திரைப்படத்தில் இணைந்து நடித்து வருகிறார். அந்த வகையில் சியான் விக்ரம், மாளவிகா மோகனன், பசுபதி ஆகியோருடன் இணைந்து தங்கலான் திரைப்படத்தில் நடித்துவரும் நடிகை பார்வதி, இப்படத்திற்காகத் தனது உடல் எடையைக் குறைத்து அதிக மெனக்கெடலுடன் நடித்து வருவதாகக் கூறப்படுகிறது.

இந்நிலையில் தங்கலான் திரைப்படத்தில் நடித்த தனது அனுபவம் குறித்து சமீபத்திய நேர்காணல் ஒன்றில் பேசிய நடிகை பார்வதி, தங்கலான் படத்திற்காக நடித்தது போல் ஒரு நடிகையாக இதுவரை ஒரு மெனக்கெடல் நிறைந்த படத்தில் நடித்ததில்லை என்று கூறியுள்ளார். மேலும் திரைப்படம் குறித்து சில கருத்துகளைப் பகிர்ந்த அவர், ஆரம்ப காலங்களில் மக்கள் எப்படி வாழ்ந்தார்கள் என்று ஆச்சர்யமாக இருக்கிறது. தியேட்டர்களில் படத்தைப் பார்க்கும்போது ரசிகர்கள் பிரம்மாண்டமாக உணர்வார்கள் என்றும் கூறியுள்ளார்.

கோலார் தங்க சுரங்கத்தில் தமிழர்கள் பட்ட துயரத்தை அடிப்படையாகக் கொண்டு பா.ரஞ்சித் இயக்கிவரும் இந்தப் படத்தில் பிரிட்டிஷ் நடிகர் டான் கால்டஜிரோனா முக்கிய கதாபாத்திரத்தில் நடிப்பதாகத் தகவல் வெளியாகி இருந்தது. மேலும் பல உண்மைச் சம்பங்கள் இந்தப் படத்தில் காட்சிகளாக இடம்பெறும் எனக் கூறப்படும் நிலையில் தங்கலான் திரைப்படம் குறித்த எதிர்ப்பார்ப்பு ரசிகர்களிடையே நாளுக்குநாள் அதிகரித்து வருகிறது என்பதும் குறிப்பிடத்தக்கது.