சொந்த வீட்டிலேயே கணவனுக்கு கொள்ளையடிக்க திட்டம் போட்டுக் கொடுத்த தெய்வமகள் சீரியல் நடிகை ஒருவர் தற்போது தலைமறைவாகியுள்ள சம்பவம் பெரும் பரபரப்பை ஏற்படுத்தியுள்ளது 

கடலூர் மாவட்டம் பண்ருட்டி அருகேயுள்ள விவசாயி ஒருவரின் மகன் மணிகண்டன். இவர் சினிமா ஆசையில் சென்னைக்கு வந்து டிவி சீரியல் நடிகைகளின் கார் டிரைவராக பணிபுரிந்து வந்தார். அந்த வகையில்தான் தெய்வமகள் சீரியலில் நடித்த சுசித்ரா என்ற நடிகையுடன் மணிகண்டனுக்கு பழக்கம் ஏற்பட்டது. இந்த பழக்கம் நாளடைவில் காதலாக மாறி இருவரும் ரகசிய திருமணம் செய்து கொண்டு குடித்தனம் நடத்தி வந்ததாக தெரிகிறது

இந்த நிலையில் கொரோனா ஊரடங்கு காரணமாக படப்பிடிப்பு இல்லாததால் செலவுக்கு பணமில்லாமல் இருவரும் தவித்துள்ளனர். இந்த நிலையில் தனது சொந்த ஊருக்கு தனது மனைவி நடிகை சுசித்ராவை மணிகண்டன் அழைத்துச் சென்று பெற்றோர்களுக்கு அறிமுகம் செய்துள்ளார்.

மணிகண்டன் அங்கு சில நாட்கள் மனைவியுடன் தங்கி இருந்த நிலையில் அவரது வீட்டில் இருந் நகை மற்றும் பணத்தை பார்த்ததும் கணவனிடம் அந்த பணத்தை கொள்ளையடித்து சென்னைக்கு சென்று குறும்படம் தயாரித்து யூடியூப்பில் பதிவேற்றம் செய்யலாம் என்று சுசித்ரா ஐடியா கொடுத்துள்ளார்

இதனை அடுத்து சுசித்ராவை மட்டும் சென்னைக்கு அனுப்பி விட்டு மணிகண்டன் சில நாட்கள் கழித்து அந்த பணம் மற்றும் நகையை கொள்ளையடித்துள்ளார். ஆனால் இதுகுறித்து மணிகண்டனின் பெற்றோர் காவல்துறையில் கொடுத்த புகாரின் அடிப்படையில் மணிகண்டன் தான் குற்றவாளி என்பதை கண்டுபிடித்த போலீசார் அவரை சுற்றிவளைத்து கைது செய்ததோடு, அவரிடம் இருந்த பணம் மற்றும் நகைகளையும் பறிமுதல் செய்தனர்

இந்த நிலையில் காதல் கணவன் கொள்ளை அடிக்கும் போது மாட்டிக் கொண்டதை அறிந்த தெய்வமகள் சீரியல் நடிகை சுசித்ரா தற்போது தலைமறைவாக இருப்பதாகவும் அவரை தேடும் பணியில் போலீசார் தீவிரமாக இருப்பதாகவும் செய்திகள் வெளிவந்துள்ளது 

கணவனுக்கு அவரது சொந்த வீட்டிலேயே கொள்ளையடிக்க திட்டம் போட்டு கொடுத்த தெய்வமகள் சீரியல் நடிகையால் பெரும் பரபரப்பு ஏற்பட்டுள்ளது